ராமநாதபுரம் மாவட்டத்தில் ஆப்பனூரில் பழமையான தமிழ் பிராமி நடுகல் கல்வெட்டு??

ஆப்பனூரில் 2,000 ஆண்டுகள் பழமையான முதல் தமிழி நடுகல் கல்வெட்டு கண்டெடுப்பு!

2,000 ஆண்டுகள் பழமையான முதல் தமிழி நடுகல் கல்வெட்டு கண்டெடுக்கப்பட்டுள்ளது குறித்து...

ராமநாதபுரம் மாவட்டத்தில் 2,000 ஆண்டுகள் பழமையான முதல் தமிழி நடுகல் கல்வெட்டு கண்டெடுக்கப்பட்டுள்ளது.

ராமநாதபுரம் மாவட்ட வரலாற்றில் முக்கியத்துவம் வாய்ந்த தொல்லியல் கண்டெடுப்பாக, மாவட்டத்தில் முதல் முறையாக சுமார் 2,000 ஆண்டுகள் பழமையான தமிழி (தமிழ்-பிராமி) எழுத்துகள் பொறிக்கப்பட்ட நடுகல் கல்வெட்டு கண்டெடுக்கப்பட்டுள்ளது.

முதுகுளத்தூர் அருகே உள்ள ஆப்பனூர் கிராமத்தின் ஆண்டியேந்தல் பகுதியில் அமைந்துள்ள அரியநாச்சியம்மன் கோயில் வளாகத்தில் இந்த கல்வெட்டு மண்மூடிக் கிடந்த நிலையில் கண்டு எடுக்கப் பட்டுள்ளது. இரண்டு ஆண்டுகளுக்கு முன்பு கோயில் குடமுழுக்கு திருப்பணியின்போது இந்தக் கல் வெளிச்சத்துக்கு வந்திருந்தாலும், அது கல்வெட்டு என்பது தெரியாமல் மரத்தடியில் வைக்கப் பட்டிருந்தது.

இந்நிலையில், கோயிலுக்கு வந்த மதுரை மாவட்டம் பேரையூரைச் சேர்ந்த ஆசிரியர் முனியசாமி, கல்வெட்டின் முக்கியத்துவத்தை உணர்ந்து, மதுரை பாண்டிய நாட்டு வரலாற்று ஆய்வு மையச் செயலாளர் சாந்தலிங்கத்திற்கு தகவல் அளித்தார். இதையடுத்து சாந்தலிங்கம் மற்றும் உதவி ஆய்வாளர் உதயகுமார் ஆகியோர் நேரில் ஆய்வு செய்து கல்வெட்டை வாசித்தனர்.

தமிழி எழுத்தில் பொறிக்கப்பட்டுள்ள கல்வெட்டின் வாசகம்: “ஆபன்னூர் ஏறிய் மாண்டு விழுந்த அத்தியன் கீரன்கல்” என்பதாகும்.

இதன் பொருள், ஆப்பனூரில் நடைபெற்ற போரில் வீரமரணம் அடைந்த கீரன் என்ற வீரனுக்காக எடுக்கப்பட்ட நடுகல் என்பதாகும். இதில் “அத்தியன்” என்பது வீரனின் தந்தை பெயராகவும், “கீரன்” என்பது வீரனின் பெயராகவும் ஆய்வாளர்கள் விளக்குகின்றனர்.

இந்தக் கல்வெட்டின் காலக்கணிப்பு மற்றும் உண்மைத்தன்மை குறித்து கல்வெட்டு நிபுணர்களான சுப்பராயலு, மார்க்சியகாந்தி மற்றும் ராஜகோபால் ஆகியோரின் கருத்துகளும் பெறப்பட்டு உறுதிப்படுத்தப்பட்டதாக சாந்தலிங்கம் தெரிவித்தார்.

மேலும், “ஆப்பனூர்” என்ற ஊர்பெயர் 2,000 ஆண்டுகளுக்கு முன்பே பயன்பாட்டில் இருந்ததற்கான உறுதியான சான்றாக இந்த கல்வெட்டு விளங்குகிறது. பாண்டிய நாட்டில் பாடல் பெற்ற 14 சிவத்தலங்களில் ஒன்றாக இப்பகுதி குறிப்பிடப்படுவதும் குறிப்பிடத்தக்கது.

சங்ககாலத் தமிழர்களின் எழுத்து மரபு, வீரர் வழிபாட்டு பண்பாடு மற்றும் சமூக வரலாற்றை வெளிச்சமிட்டுக் காட்டும் அரிய ஆதாரமாக இந்த தமிழி நடுகல் கல்வெட்டு அமைந்துள்ளதாக தொல்லியல் ஆய்வாளர்கள் தெரிவித்துள்ளனர்.

ஆபன்னூர் தமிழி நடுகல் கல்வெட்டு எப்படி உடைந்த பகுதியில் இருக்கும் ?

~ துண்டாக உடைந்தாலும் கல்வெட்டு இருக்கும் - புலிமான்கோம்பை நடுகல்

• அதன் எழுத்துக்கள் எப்படி சேதமடையாமல் இருக்கின்றது ?

~ புலிமான்கோம்பை கல்வெட்டிலும் எழுத்துக்கள் சேதமடையாமல் தான் உள்ளது.

• வெள்ளைக்கல் தேர்வு எப்படி ?

~ வெள்ளைக்கல்லில் / சீனிக்கல்லில் கல்வெட்டு அடிக்க கூடாத என்று எந்த விதியும் இல்லை. புலிமான்கோம்பை கல்வெட்டு வெள்ளைகல்லில் தான் வெட்டப்பட்டுள்ளது.

• சங்க இலக்கியங்களுடன் ஒப்பீடு ?

~ எந்த தொல்லியல் சான்றுகள் கிடைத்தாலும் அதனை சங்க இலக்கியங்களுடன் ஒப்பிடுவது மரபு. சங்க இலக்கியம் படித்திருந்தால் எதற்காக ஒப்பிடுகிறார்கள் என்பது தெரியும்.

• இந்த கல் ?

~ இதனை நாங்கள் தொல்காப்பிய நடுகல் நிலைகளுடன் ஒப்பிடுகின்றோம். அந்த வகையில் இப்பகுதியிலேயே கிடைக்கின்ற ஸ்படிக கல் / சீனிக்கல்லில் நடுகல் வெட்டப்பட்டுள்ளது. இந்த வகையான கல்லில் கல்வெட்டு வெட்டக்கூடாது என்று எந்த இலக்கியங்களிலும் விதி இல்லை. தேனூரில் கிடைத்த தங்க கட்டிகளில் இருந்த எழுத்துக்களை போலி என்று கூற முடியுமா ?

• புதியதாக கல்வெட்டு அடிக்கப்பட்டது

~ சமஸ்தான கட்டுப்பாட்டில் உள்ள கோயில், மக்கள் நடமாட்டம் உள்ள சிறிய கோயில், குறிப்பாக கண்காணிப்பு கேமராக்கள் பொறுத்தப்பட்டுள்ள கோயிலில் கல்வெட்டு அடிக்க முடியுமா ? என்பது கேள்வி. கல்லில் கல்வெட்டு உள்ளது என்பது அங்குள்ள பெரியவர்களுக்கு எப்போதோ தெரிந்த ஒன்றுதான்.

• எழுத்துக்கள் ஆழமாக உள்ளது.

~ எழுத்துக்கள் ஆழமாக இருந்தால் தான் நம்பகத்தன்மை கொண்டது. மேட்டுப்பட்டி சித்தர் மலை கற்படுக்கைகளை இதற்கு எடுத்துக்காட்டாக கூறலாம். மலைகளின் பாறையை ஆழமாக வெட்டி நீர்வடி விழிம்பு செய்தவர்கள், போர போக்கில் கல்வெட்டை கீறிவிட்டு செல்ல மாட்டார்கள். கிண்ணிமங்கலம் மாதிரி கீறல் வடிவில் அல்லது கோடு போட்டமாதிரி தெளிவாக இருந்தால் தான் சந்தேகத்திற்குரியது.

கல்வெட்டை நேரில் பார்க்காமல் போலி என்று உறுதியாக கூறுபவர்கள் வரலாற்றுப் போலிகளாக கருதப்படுகின்றனர். அவர்களுக்கு கேள்விகள் கேட்க தகுதியே இல்லை.

நியமான கேள்விகள் வரவேற்கப்படுகின்றன

#tholliyal_ramanathapuram #ramanathapuram_mavatta_tholliyal