கரூரின் 64 கோவில்களின் 35 ஆயிரம் கோடி சொத்துகள்ஆக்கிரமிப்பில்? -? -2015 ஆவணங்கள் காணாமல் போனதா?

 கரூரின் 64 கோவில்களின் சொத்துகள்: ஆக்கிரமிப்பு மற்றும் மீட்பு நடவடிக்கைகள் - நீதிமன்றம் பிறப்பித்த உத்தரவு!

Authored by: மரிய தங்கராஜ்|Samayam Tamil•22 Sept 2025,

கரூர் மாவட்டத்தில் உள்ள கோவில்களுக்கு சொந்தமான சொத்துக்களை மீட்க கோரிய வழக்கில், மதுரை உயர்நீதிமன்றம் அதிரடி உத்தரவு பிறப்பித்துள்ளது. கோவிலுக்கு சொந்தமான நிலங்கள் ஆக்கிரமிப்பில் உள்ளதா? கடைகள் மூலம் வரும் வருமானம் எவ்வளவு? 2015ல் காணாமல் போன ஆவணங்கள் என்ன? என மாவட்ட ஆட்சியர் மற்றும் இந்து சமய அறநிலையத்துறை ஆணையாளர் பதிலளிக்க நீதிமன்றம் உத்தரவிட்டுள்ளது. இந்த வழக்கு அக்டோபர் 29க்கு ஒத்தி வைக்கப் பட்டுள்ளது.

கரூர் மாவட்டத்தில் உள்ள கோவில்களுக்கு சொந்தமான சொத்துக்களை மீட்க உயர் நீதிமன்றம் உத்தரவிட்டுள்ளது.

அருள்மிகு கல்யாண பசுபதீஸ்வரர் சுவாமி கோவில் உட்பட 64 கோவில்களின் சொத்துக்களை மீட்டு பராமரிக்கக் கோரிய வழக்கில் நீதிமன்றம் இந்த உத்தரவை பிறப்பித்துள்ளது. கோவில்களின் சொத்து விவரங்கள், ஆக்கிரமிப்பில் உள்ள சொத்துக்கள், கடைகள் மற்றும் வருமானங்கள் குறித்த அறிக்கையை தாக்கல் செய்யுமாறு கரூர் மாவட்ட ஆட்சியர் மற்றும் இந்து சமய அறநிலையத்துறை ஆணையாளருக்கு நீதிமன்றம் உத்தரவிட்டுள்ளது. மேலும், 2015-ஆம் ஆண்டு காணாமல் போன கோவில் நிலங்கள் தொடர்பான ஆவணங்களையும் நீதிமன்றத்தில் சமர்ப்பிக்க வேண்டும் என்று நீதிபதிகள் உத்தரவிட்டுள்ளனர்.

கோவில் சொத்துக்களை ஆக்கிரமித்த தனி நபர்கள்!

சேலத்தைச் சேர்ந்த திருத்தொண்டர் சபையின் அறங்காவலர் ராதாகிருஷ்ணன் என்பவர் உயர் நீதிமன்ற மதுரை கிளையில் மனு தாக்கல் செய்தார். அந்த மனுவில், கரூர் மாவட்டத்தில் உள்ள 64 கோவில்களுக்கு ஏராளமான சொத்துக்கள் உள்ளன. ஆனால், இந்த சொத்துக்கள் தனி நபர்களால் ஆக்கிரமிக்கப்பட்டு உள்ளன. சில சொத்துக்கள் பட்டா பெயர் மாற்றமும் செய்யப்பட்டுள்ளன. இது குறித்து இந்து சமய அறநிலையத்துறை மற்றும் தமிழ்நாடு அரசின் தலைமைச் செயலாளருக்கு மனு கொடுத்தும் நடவடிக்கை எடுக்கவில்லை. எனவே, கோவில் சொத்துக்களை மீட்டு, இந்து சமய அறநிலையத்துறையின் விதிகளுக்கு உட்பட்டு பராமரிக்க வேண்டும் என்று அவர் கோரிக்கை விடுத்திருந்தார்.

கோவில் சொத்து விவரங்களை அறிக்கையாக தாக்கல் செய்ய உத்தரவு!

இந்த மனுவை விசாரித்த நீதிபதிகள் அனிதா சுமந்த் மற்றும் குமரப்பன் ஆகியோர், கரூர் மாவட்டத்தில் எத்தனை கோவில்கள் உள்ளன? கோவில்களின் சொத்து விவரங்கள் என்ன? எவ்வளவு சொத்துக்கள் ஆக்கிரமிப்பில் உள்ளன? எத்தனை கடைகள் உள்ளன? அவற்றின் வருமானம் எவ்வளவு? ஆக்கிரமிப்புகளை மீட்க என்ன நடவடிக்கை எடுக்கப்பட்டுள்ளது? என்பது குறித்து அறிக்கை தாக்கல் செய்யுமாறு உத்தரவிட்டனர்.

இந்து சமய அறநிலையத்துறை அறிக்கை!

மனுதாரர் ராதாகிருஷ்ணன் நீதிமன்றத்தில் ஆஜராகி ஒரு முக்கியமான தகவலை தெரிவித்தார். 2015-ஆம் ஆண்டு கோவில் நிலங்கள் குறித்து வருவாய்த்துறை மற்றும் இந்து சமய அறநிலையத்துறை ஒரு அறிக்கை தயார் செய்தது. ஆனால், அந்த அறிக்கை மாயமாகி விட்டது. தற்போது ஆக்கிரமிப்பில் உள்ள 500 ஏக்கர் நிலங்களின் மதிப்பு 35 ஆயிரம் கோடி ரூபாய்க்கு மேல் இருக்கும். எனவே, கோவில் சொத்துக்களை மீட்க நடவடிக்கை எடுக்க வேண்டும் என்று அவர் வாதிட்டார்.

கரூர் மாவட்ட ஆட்சியரும் அறிக்கை தாக்கல் செய்ய உத்தரவு!

இதனை பதிவு செய்த நீதிபதிகள், "கரூர் மாவட்டத்தில் எத்தனை கோவில்கள் உள்ளன? அந்த கோவில்களின் சொத்து விவரங்கள் எவ்வளவு? அதில் எவ்வளவு சொத்துக்கள் ஆக்கிரமிப்பில் உள்ளது? எத்தனை கடைகள் உள்ளது? அதற்கான வருமானங்கள் எவ்வளவு? ஆக்கிரமிப்புகளை மீட்க என்ன நடவடிக்கை எடுக்கப்பட்டுள்ளது?" என்பது குறித்து கரூர் மாவட்ட ஆட்சியர் மற்றும் இந்து சமய அறநிலையத்துறை ஆணையாளர் இணைந்து அறிக்கை தாக்கல் செய்ய வேண்டும் என உத்தரவிட்டனர்.

வழக்கு விசாரணை அக்டோபர் 29க்கு ஒத்திவைப்பு!

மேலும், 2015-ஆம் ஆண்டு காணாமல் போனதாக கூறப்படும் கோப்பையும் நீதிமன்றத்தில் தாக்கல் செய்ய வேண்டும் என்று நீதிபதிகள் உத்தரவிட்டனர். இந்த வழக்கு விசாரணை அக்டோபர் 29-ஆம் தேதிக்கு ஒத்தி வைக்கப்பட்டுள்ளது. குறைந்தபட்சம் 20 கோவில்களின் நிலை அறிக்கையாவது அடுத்த விசாரணையில் தாக்கல் செய்ய வேண்டும் என்று நீதிபதிகள் உத்தரவிட்டுள்ளனர்.

கோவில் சொத்துக்களை பாதுகாப்பதில் அரசு தீவிரமாக செயல்பட வேண்டும் என்று பக்தர்கள் கோரிக்கை விடுத்துள்ளனர். சொத்துக்களை மீட்டு கோவிலுக்கு வருவாய் கிடைக்க வழி செய்ய வேண்டும் என்றும் அவர்கள் எதிர்பார்க்கின்றனர். இந்த வழக்கு விசாரணை முக்கியமான கட்டத்தை எட்டியுள்ளது. அக்டோபர் 29-ஆம் தேதி என்ன நடக்கும் என்பதை பொறுத்திருந்து பார்ப்போம்.

https://tamil.samayam.com/latest-news/madurai/property-of-64-temples-in-karur-encroachment-and-recovery-measures-court-order/articleshow/124053724.cms