கொளத்துார், சுற்றுப்புறத்தில் 200க்கும் மேற்பட்ட வண்ண மீன் கடைகள் உள்ளன. இவற்றில், உள்நாடு, வெளிநாடு மீன்கள் இறக்குமதி மற்றும் விற்பனை நடக்கிறது. இதை சார்ந்த உப தொழிலும் அதிகளவில் நடந்து வருகிறது.
அதனால், வண்ண மீன்கள் தொழிலை விரிவாக்கம் செய்ய, முந்தைய தி.மு.க., அரசு முடிவு செய்தது. இதற்காக, சென்னை பெருநகர வளர்ச்சி குழுமமான சி.எம்.டி.ஏ., சார்பில், வடசென்னை வளர்ச்சி திட்டத்தின் கீழ், 53.30 கோடி ரூபாய் ஒதுக்கப்பட்டது.
வில்லிவாக்கம் பாடி மேம்பாலம் அருகே சிவசக்தி காலனியில், 4 ஏக்கர் பரப்பளவில், கொளத்துார் வண்ண மீன்கள் வர்த்தக மையம், மூன்று தளங்களில் 188 கடைகள், 'பார்க்கிங்' உள்ளிட்ட வசதிகளுடன் கட்டி, 2025, அக்., 11ல் திறக்கப்பட்டது.
ஆரம்பத்தில் 40 கடைகள் முழுமையாக திறக்கப்பட்டன. 150க்கும் மேற்பட்ட கடைகளுக்கு வியாபாரிகள் முன்பணம் தந்தும், வாடகை உயர்வு, அடிப்படை வசதி உள்ளிட்ட சிக்கல்களால் பலரும் கடைகளை திறக்காமல் உள்ளனர். தற்போது தினமும் 10 கடைகள் மட்டுமே திறக்கப்படுகின்றன.
வார இறுதி நாட்களிலும் இதே நிலை நீடிப்பதால், வண்ண மீன்கள் வாங்க வரும் பொதுமக்கள் ஏமாற்றத்துடன், கொளத்துார் பகுதியில் உள்ள பழைய கடைகளுக்கே, திரும்பிச் செல்கின்றனர்.
வாடகை உயர்வு, தண்ணீர் வசதி, சோலார் மின்சாரம் உள்ளிட்ட அடிப்படை வசதிகளை ஏற்படுத்தாமல், அவசரகதியில் திறந்ததால், பல கோடி ரூபாய் செலவில் கட்டப்பட்ட இந்த மையம், தற்போது மூடுவிழாவை நோக்கி செல்கிறது.
இதுகுறித்து, மீன் வியாபாரிகள் கூறியதாவது:வர்த்தக மையத்தில் கடையின் வாடகை 17 ஆயிரம் ரூபாய் வரை உள்ளது. ஆனால் கொளத்துாரில் 7,000 ரூபாய் தான்.
மையத்தில், 'கார்கோ - லிப்ட்' வசதி இல்லாததால், பெரிய மீன் தொட்டிகளை மேல்தளங்களுக்கு எடுத்து செல்ல சிரமமாக உள்ளது.
மீன்களுக்கு தேவையான சுத்தமான தண்ணீர் வசதியும் இல்லை. தனியாரிடம் லிட்டருக்கு, 80 பைசா கொடுத்து தண்ணீர் வாங்குகிறோம்.
கடைகளுக்கு முன்பணம் செலுத்தி பல மாதங்களாகியும், இந்த பிரச்னைகளால் கடையை திறக்க முடியவில்லை. தற்போது, கடைகளை திறக்காதோரிடம் வாடகை தரும்படி, அதிகாரிகள் கெடுபிடி காட்டுகின்றனர்.
கொளத்துாரில் காலை 9:00 மணிக்கே வியாபாரம் தொடங்கி விடுகிறது. ஆனால் புதிய மையத்தில் கடைகள் இருந்தாலும், வாடிக்கையாளர்களை அழைத்து வருவதற்கான எந்தவிதமான விளம்பர நடவடிக்கைகளையும், சி.எம்.டி.ஏ., அதிகாரிகள் செய்வதில்லை. குறிப்பாக, நான்கு லட்சம் ரூபாய் மின் கட்டணத்தை குறைக்க, சோலார் மின்வசதி ஏற்படுத்த வேண்டும். இவ்வாறு அவர்கள் கூறினர்.
சி.எம்.டி.ஏ., அதிகாரிகள் கூறுகையில், 'கொளத்துாரில் கடைகளை காலி செய்து புதிய வண்ண மீன் மையத்தில் அவர்களை அமர்த்துவதற்கான நடவடிக்கைகளை எடுத்து வருகிறோம்' என்றனர்.
என்ன தீர்வு? கொளத்துாரில் சட்டவிரோதமாக இயங்கி வரும் கடைகளை அகற்றி, வண்ண மீன் வியாபாரத்தை ஒரே இடத்தில் முறைப்படுத்தினால், இங்குள்ள புதிய வர்த்தக மையத்துக்கு வாடிக்கையாளர்கள் வருகையும் அதிகரிக்கும்; அரசுக்கும் வருமானம் அதிகரிக்கும் என, மீன் வியாபாரிகள் தெரிவித்துள்ளனர்.
No comments:
Post a Comment