கோவில் புனிதத்தை அவமதிக்கும் வகையில் நடந்து கொண்ட அமைச்சர் ராஜேஷ்குமார் காங் எம்பி., ஜோதிமணி செருப்பு அணிந்தவாறே

 கரூர்: கரூர் அருகே புகழ்பெற்ற திருமுக்கூடலுார் அகத்தீஸ்வரர் கோவிலுக்கு, சுற்றுலாத்துறை அமைச்சர் ராஜேஷ்குமார், கரூர் காங் எம்பி., ஜோதிமணி, கிருஷ்ணராயபுரம் தவெக எம்எல்ஏ சத்யா உட்பட பலர் ஆய்வுக்காக சென்றிருந்தனர். அப்போது, அவர்கள் செருப்பு அணிந்தவாறே கோவில் வளாகத்தில் ஆய்வில் ஈடுபட்டதாக சர்ச்சை எழுந்தது. 

இது தொடர்பாக பா.ஜ., ஆன்மிகம் மற்றும் கோவில் மேம்பாட்டு பிரிவு மாவட்ட தலைவர் குப்புராவ் வெளியிட்ட அறிக்கை:

கோவில் வளாகம் புனிதமான இடம். தவறுதலாக நடந்திருந்தால் கூட பரவாயில்லை; அங்கிருந்த பக்தர்கள் சுட்டிக்காட்டியும், அலட்சியமாக பதிலளித்து விட்டு சென்ற செயல் அதிர்ச்சியளிக்கிறது. இது கடவுளை மட்டும் அவமதிக்கும் செயல் அல்ல; ஒட்டுமொத்த பக்தர்களையும், கடவுள் நம்பிக்கை கொண்ட ஹிந்து மக்களையும் அவமதிப்பதாகும். இதுபோன்ற செயல்கள் மற்றவர்களுக்கு தவறான முன்னுதாரணம்.

கோவில் புனிதத்தை அவமதிக்கும் வகையில் நடந்து கொண்ட அமைச்சர் ராஜேஷ்குமார் உட்பட அனைவரும் பகிரங்க மன்னிப்பு கேட்க வேண்டும். இவ்வாறு அதில் கூறப்பட்டுள்ளது.

இந்து மக்கள் கட்சி மாவட்ட அமைப்பு செயலர் சுரேஷ் வெளியிட்ட அறிக்கை:திருமுக்கூடலுார் அகத்தீஸ்வரர் கோவிலில் அமைச்சர் ராஜேஷ்குமார், காங் எம்.பி. ஜோதிமணி, தவெக எம்எல்ஏ சத்யா உள்ளிட்டோர் செருப்புடன் நுழைந்து ஹிந்து மக்களின் நம்பிக்கை, பாரம்பரிய ஆலய வழிபாட்டு முறைகளை அவமதித்துள்ளனர்.

கோவில் வளாகத்தில் செருப்புடன் நுழைவது ஆகம விதிகளுக்கும், பக்தர்களின் மத உணர்வுகளுக்கும் எதிரானது. இதை கண்டித்து நாளை (நவ.12) காலை, 10:00 மணிக்கு கரூர் கலெக்டர் அலுவலகம் முன் ஆர்ப்பாட்டம் நடக்கிறது. இவ்வாறு, கூறப்பட்டுள்ளது.