கரூர் கூட்ட நெரிசலில் சிக்கி இறந்தவர்களின் குடும்பத்தை சேர்ந்த 32 பேருக்கு அரசாங்க பணி கொடுப்பது தவறான முன்னுதாரணம்.

 கரூர் துயரத்தில் இறந்தவர்களின் குடும்பத்தினருக்கு கருணை அடிப்படையில் அரசாங்க பணி நியமனம் தொடர்பாக (lengthy post. TLDR at the end)

1. அரசாங்கத்தால் நேரடியாகவோ மறைமுகமாகவோ உயிரிழப்பவர்கள் இரு வகைப் படுவர். முதல் வகை martyrs. இரண்டாம் வகை victims.

Martyrs - தியாகிகள்

2. முதல் வகையான martyrs எனப்படும் தியாகிகள் நாட்டுக்காகவோ அல்லது நாடு முன்போ பின்போ கொண்டிருக்கும் விழுமியங்களுக்காக மரணிப்பவர்கள். நாட்டை காக்க உயிர்விடும் ராணுவ வீரர்கள் அனைவருக்கும் தெரிந்த உதாரணம். அவர்களின் வாரிசுகளுக்கு பப்ளிக் செக்டரிலும் இன்ன பிற வேலைகளிலும் இடஒதுக்கீடு உண்டு. பணியில் இருக்கும்போது மரணமடைந்த காவல்துறையினரின் குடும்பத்திற்கும் இதே போன்ற சலுகை உண்டு.

3. ஆட்சி மாற்றத்திற்கு பின்பு வரும் அரசாங்கம் தனக்கு முந்தைய ஆட்சிக்காலத்தில் தற்போதைய அரசின் கொள்கைகளுக்காக பாடுபட்டவர்களுக்கு நிவாரணம் கொடுக்கும். மரணம் அடைந்தவர்களின் குடும்பத்திற்கு கருணை அடிப்படையிலான வேலை கொடுக்கும். இங்கிலாந்திடம் இருந்து இந்திய அரசாங்கம் பெற்றது transfer of power என்ற கோணத்தில் பார்க்கும்போது சுதந்திர போராட்ட வீரர்கள் தியாகிகள் ஆகிறார்கள். அவர்களுக்கு கொடுக்கப்படும் சலுகைகளும் அவர்களின் குடும்பத்தினருக்கு கொடுக்கப்படும் பணியும் நியாயமாகிறது. தமிழ்நாட்டு மொழிப்போர் தியாகிகளையும் அவ்வாறு சொல்லலாம்.

4. இதில்லாமல் பல வகை தியாகிகள் நாட்டில் இருந்துகொண்டு தான் இருக்கின்றனர். ஆனால் அவர்கள் நாட்டிற்கான தியாகிகள் அல்ல. மூழ்கிக்கொண்டிருக்கும் குழந்தைகளை காப்பாற்றி உயிர் விடும் இளைஞர், பேரிடரில் மக்களுக்காக உயிர்விட்ட பொதுஜனம் என பலர் இந்தவகையில் வருவார்கள். அவர்கள் தியாகிகள். பொதுநலத்திற்கான தியாகிகள், வீரர்கள். ஆனால் per se அவர்கள் நாட்டிற்காக உயிர் நீத்தவர்கள் அல்ல. அவர்களுக்கு விருதுகள், பணம் உண்டு. ஆனால் அரசாங்க வேலை என்பது அரிதிலும் அரிது.

5. நாட்டின் சேவைக்காக விளையாட்டு வீரர்கள் மற்றும் சிலருக்கு வேலை கொடுக்கப்படுவது உண்டு.

Victims - பாதிக்கப்பட்டவர்கள்

6. இரண்டாம் வகையான victims எனப்படும் பாதிக்கப்பட்டவர்கள் குறிப்பாக அரசாங்கத்தால் பாதிக்கப்பட்டவர்களில் பல வகையினர் உண்டு. முன்பு அரசாங்கத்திற்கு sovereign immunity இருந்தது. இங்கிலாந்து அரசன் கொலை செய்தாலும் அவனை தண்டிக்க முடியாது ஏனெனில் அவன் சட்டத்திற்கு மேலானவன். ஆனால் காலப்போக்கில் அரசாங்கம் liabilities ஐ ஏற்றுக்கொண்டுவிட்டது. சாலை விபத்து, கூட்ட நெருக்கடியில் மரணம் என பல வகை இறப்புக்கு அரசாங்கம் நிவாரணம் வழங்குகிறது.

7. முந்தைய திமுக அரசாங்கம் உண்மையில் இந்த victims மற்றும் martyrs ஆகியவற்றின் அர்த்தங்களை தன் செயல்பாடுகளில் கொஞ்சம் குழப்பிவிட்டது. தூத்துக்குடி துப்பாக்கி சூட்டில் இறந்தவர்கள் victims. அரசாங்கம் martyrs க்கு பொதுவாக கொடுக்கப்படும் கருணை அடிப்படையிலான பணியை கொடுத்தது. கள்ளக்குறிச்சியில் கள்ள சாராயம் குடித்து இறந்தவர்கள் victims ஆ என்பது குழப்பம் தான். அவர்கள் அராசாங்க மதுபுட்டிகளில் விற்கப்பட்ட மதுவையோ அல்லது அரசாங்க தயாரிப்பு என்று நம்பிய மதுவை குடித்து இறந்திருந்தால் அரசாங்கத்தின் victims எனலாம். ஆனால் அதில் இருக்கும் அபாயம் தெரிந்து குடிப்பவர்கள் victims என்பது அதன் அர்த்தத்தை இன்னமும் விஸ்தீகரிப்பது.

8. அவர்களோடு ஒப்பிடும்போது கரூரில் இறந்த 41 பேர் நிஜமான victims. பலர் இங்கே அவர்கள் நடிகரை பார்க்க கூடினார்கள், திரைக்கவர்ச்சி என்றெல்லாம் எழுதுவது இறந்தவர்களையும் நம் ஜனநாயகத்தையும் அவமானப்படுத்துவது. அரசியலும் தேர்தல் செயல்பாடும் ஜனநாயகத்தின் அடிப்படை. விஜய் ஒரு கட்சித் தலைவராக தான் கூட்டம் நடத்தியிருக்கிறார். அதற்கான பாதுகாப்பை உறுதிசெய்யவேண்டியது அரசாங்கம். அதற்கான வழிமுறைகளை பின்பற்றியிருக்க வேண்டியது தமிழக வெற்றிக் கழகம் என்னும் அரசியல் கட்சி.

9. இரு தரப்பிலும் தவறுகள் இருக்கின்றன. இரு தரப்புகளும் பொருளாதார நிதியுதவிகளை அறிவித்திருக்கின்றனர். 30-35 லட்சம் இரு தரப்பும் கொடுத்திருப்பார்கள் என நினைக்கிறேன். இறந்தவர்கள் பெரும்பாலும் சாதி அடிப்படையிலும் பொருளாதார அடிப்படையிலும் நலிந்தவர்கள் என்னும்போது அது முழுமையான நிவாரணம் இல்லையென்றாலும் அருகில் நெருங்கி வருவது. உயிரிழப்பை திருப்பி உயிர் கொடுக்கும் ஒரே வழியை தவிர பிற அனைத்தும் நஷ்ட ஈடு தான்.

10. இத்துடன் ஒப்பிட நெருக்கமான ஒன்று என்றால் மொழிப்போர் தியாகிகள் தாம். உண்மையில் மொழிப்போர் தியாகிகள் போராடியது நிறுவப்பட்ட மத்திய அரசாங்கத்தின் சட்டத்திற்கு எதிராக. அப்போதைய மாநில அரசும் அதற்கு துணை நிற்கவில்லை. ஆனால் அடுத்த மாநில அரசாங்கம் அவர்கள் போராட்டத்தை மாநிலத்தின் கொள்கைகளுக்கு நிகரான ஒன்றாக கண்டது. அவர்களுக்கு ஓய்வூதியம், அரசாங்க பணிகளில் முன்னுரிமை ஆகியவற்றை கொடுத்தது. அதே நேரம் இந்திரா காந்தியின் எமெர்ஜன்ஸியினை எதிர்த்து போராடியவர்களுக்கோ அவர்களின் குடும்பத்திற்கோ இது போன்ற சலுகைகள் எதுவுமில்லை. சில மாநில அரசாங்கங்கள் மாதாந்திர பென்ஷன் போன்றவற்றை கொடுக்கிறார்கள் ஆனால் கருணை அடிப்படையிலான பணியை கொடுப்பதில்லை.

11. இவற்றுடன் ஒப்பிடும்போது கரூரில் கூட்ட நெரிசலில் சிக்கி இறந்தவர்கள் victims மட்டுமே. அவர்கள் மொழி போராட்டத்தினர் போலவோ மிசாவில் தண்டனை பெற்றவர்கள் போலவோ தங்கள் உயிருக்கு ஆபத்தான விஷயத்தை செய்யவில்லை. அவர்கள் ஒரு கூட்டத்தில் கலந்துகொண்டவர்கள். அதனால் துரதிருஷ்டவசமாக உயிரிழந்தவர்கள்.

12. தினம் தினம் அராசாங்கத்தின் தவறினால் மரணிப்பவர்களும் அரசாங்க பணியில் இருக்கும்போது மரணிப்பவர்களும் இருந்துகொண்டே இருக்கிறார்கள். நேற்று கூட தஞ்சாவூரில் அரசு நெல் கொள்முதல் நிலையத்தில் மூட்டைகள் விழுந்து ஒருவர் பலி. அவரின் குடும்பத்திற்கு 3 லட்சம் மட்டுமே நிவாரணம். கடந்த வருடம் அதிமுக பொதுக்கூட்டம் ஒன்றில் கலந்துகொண்டு காரில் திரும்பிய அதன் உறுப்பினர்கள் சிலர் சாலை விபத்தில் இறந்தார்கள். அவர்கள் குடும்பத்தில் ஒருவருக்கு அதிமுக அராசாங்க பணி கொடுத்திருந்தால் அதனை ஏற்றுக்கொள்ள முடியாது.

கரூர் துயரத்தில் இன்னமும் முழு உண்மை வெளிவரவில்லை

13. மேலும் கரூர் வழக்கில் இன்றைய முதல்வர் பெயர் இணைக்கப்படவில்லை. ஆனால் தவெக கட்சியின் பொதுச்செயலாளர் என் ஆனந்த், அருண் ராஜ், ஆதவ் அர்ஜுனா போன்றோர் இணைக்கப்பட்டனர். விஜய் பெயர் விடுபட்டது புதிரானது. தேர்தலில் விஜய் அனுதாபம் பெற உதவியிருக்கும் என்று திமுக நினைத்திருந்தால் அது கோழைத்தனம். விஜய் பெயர் சேர்க்கப்பட்டால் அது பொது அமைதியை குலைக்கும் என்று நினைத்திருந்தாலும் அது கோழைத்தனம். ஜெயலலிதாவின் 2011-2016 ஆட்சிக்காலத்தில் சித்திரை முழுநிலவு கூட்டத்திற்கு பின் ஜெ குரு தேசிய பாதுகாப்பு சட்டத்தில் கைதுசெய்யப்பட்டார். டாக்டர் ராமதாஸ் கூட அதே ஆட்சிக்காலத்தில் கைது செய்யப்பட்டார். அவர்கள் கைதையே அராசாங்கம் சமாளிக்க முடியுமென்றால் விஜய் பெயரை சேர்ப்பதில் என்ன மாநிலத்தின் இயல்பு நிலை பாதிக்கப்பட்டுவிடும்? ஜெயலலிதா அவரின் தவறுகளை தாண்டியும் நிற்க அந்த தைரியமான நிர்வாக அணுகுமுறை தான் காரணம். கோழை வாழ்வதே இல்லை, வீரன் சாவதே இல்லை என்று கருணாநிதி எழுதியிருக்கிறார். அன்று கரூர் துயரத்தின்போது சாணக்யத்தனமாக நடந்ததால் என்ன மாறிவிட்டது? அதே ஆட்சி இழப்பு. முதல்வரே சொந்த தொகுதியில் தோல்வி.

14. இதில் இன்னொரு சிக்கல் வழக்கு விசாரணை இன்னமும் நடைபெற்றுக்கொண்டிருக்கிறது. ஆதவ் அர்ஜுனா முன்பே கரூர் துயரத்திற்கு ஒரு சதிக்கோட்பாட்டை முன்வைத்தார். அமைச்சரான பின்பும் அதை ஒரு முறை சொன்னார். இன்று மாநில அரசின் சீனியரிட்டியில் இரண்டாம் இடத்தில இருக்கும் என்ஆனந்த் வழக்கில் இருக்கிறார். அப்படியிருக்கையில் அராசாங்கம் இதை செய்வது முறையற்றது.

15. ஆதவ் அர்ஜுனா கரூர் துயரத்தின் போது பங்களாதேஷில் நடந்த ஜென் ஸி புரட்சி பற்றி குறிப்பிட்டார். அன்று பங்களாதேஷில் மாணவர்கள் போராடியதன் முக்கிய காரணங்களில் ஒன்று நாட்டின் சுதந்திரத்திற்காக பாடுபட்டவர்களின் வாரிசிற்கு கொடுக்கப்படும் இடஒதுக்கீடு மற்றும் அரசுப் பணிகள். இதனால் இளைஞர்கள் பாதிக்கப்பட்டனர். இன்று தவெக அரசாங்கமே நேரடி பணி நியமனம் மூலம் அவ்வாறே செய்கிறது. ஒரு வேலை வாய்ப்பு என்றால் கரூர் சம்பவத்தின் குடும்பத்தினரை விட அதில் தேர்வடைய அரசாங்க தேர்வுகளுக்கு தயாரான போட்டியாளர்களுக்கே அதிக தகுதி உண்டு. அது க்ரூப் 4 என்றாலுமே.

16. தமிழ்நாட்டில் கருணை அடிப்டையில் பணியை பெற்ற ஒரு பிரபலம் சவுக்கு ஷங்கர். அவரது தந்தை பணியில் இருக்கும்போது உயிரிழந்ததால் விஜிலென்ஸ் பிரிவில் கிளெர்க்காக சேர்ந்தார். அவர் பிரகாலத்தில் நிறைய அரசியல் திருப்பங்களை ஏற்படுத்தினார். ஆனால் அவர் சேர்ந்த பணிக்கு அவர் எந்த வகையிலும் நல்லதை செய்யவில்லை. அதற்கு பாதகமே செய்தார். பொதுவாக ஒன்றை இலக்குடன் முயல்பவர்களுக்கு அதன் மேல் இருக்கும் ஈடுபாடு இவ்வாறு பணி பெறுபவர்களுக்கு இல்லை.

17. கரூர் துயரத்தில் இறந்தவர்களின் குடும்பத்தினர் சமூக பொருளாதாரத்தில் பின்னடைந்தவர்கள். அவர்கள் குடும்பத்தினர் பெரும் படிப்போ வசதியோ இல்லாதவர்கள். அவர்களுக்கு கொடுக்கப்படும் பணிகள் covetable அல்லது lucrative அல்ல என்றாலும் in principle அராசாங்கம் செய்வது தவறு. இன்று தவெக பெரிய கட்சி. ஆளும் கட்சி. அவர்களின் அலுவலக பணிகள் முதல் பல பணிகள் இருக்கின்றன. அதில் வேலை கொடுக்கலாம். இன்னொன்று அவர்கள் அந்த கட்சியின் ஆதரவாளர்கள் என்றால் அடுத்த சில தேர்தல்களுக்கு கரூரில் ஒரு தொகுதியில் அவர்களில் ஒருவரை தேர்ந்தெடுத்து சட்டமன்ற உறுப்பினராக போட்டியிட வைக்கலாம். நகராட்சி மற்றும் உள்ளாட்சிகளில் அந்த குடும்ப உறுப்பினர்களை போட்டியிட்டு வெற்றி பெற வைக்கலாம். அரசாங்க பணி மட்டுமே மக்களுக்கான சேவை அல்ல.

TLDR: கரூர் கூட்ட நெரிசலில் சிக்கி இறந்தவர்களின் குடும்பத்தை சேர்ந்த 32 பேருக்கு அரசாங்க பணி கொடுப்பது தவறான முன்னுதாரணம். அவர்கள் victims(பாதிக்கப்பட்டவர்கள்). அவர்கள் martyrs(தியாகிகள்) அல்ல. அவர்களுக்கு உதவ பலவழிகள் இருக்கின்றன இந்த பணி நியமனங்கள் அவற்றில் ஒன்று அல்ல. இது பொது நம்பிக்கை மேலே அவநம்பிக்கையை ஏற்படுத்துகிறது.

https://www.facebook.com/dvaipayana.krishna/posts/pfbid0irmviMJzQdoi3BwZTcANT1mtRfeyXMokfmxWCjRYGVyGWfEfKceYNgAuzExpQk5tl?__cft__[0]=AZaHF6bn-H-BBc9ydeWBvL2Ojih_Tw6A70Ku_XWAa5Rx0jtlnbzU0jowze8khG0QQMJifZpzAjJ2HEuvsBhmxMn6KTZ1Fsrs3wunTiHVuYysc9I6xa_Gc_kUPysgzOoxn_GYDGYntzYe5pSNl2bGllTG&__tn__=%2CO%2CP-R