ஆயிரம் கோடிகளின் நிழலில் ஒரு ஊடக அதிபர்: ஆர். பிரேம்குமார் கைது பின்னணி!
'நியூஸ் தமிழ் 24×7' தொலைக்காட்சி சேனலின் இயக்குநரான ஆர். பிரேம்குமார், சுமார் ரூ.5,000 கோடி நிதி மோசடி வழக்கில் கேரளக் கோழிக்கோடு குற்றப்பிரிவு காவல்துறையினரால் சென்னையில் கைது செய்யப்பட்டுள்ளார். கைதான பிறகு உடல்நலக் குறைவு காரணமாக அவர் மருத்துவமனையில் அனுமதிக்கப்பட்ட நிலையில், அமலாக்கத்துறையும் இவ்வழக்கில் தனியாக விசாரணை நடத்தி வருகிறது.
தமிழக ஊடக உலகிலும் வர்த்தக வட்டாரங்களிலும் தற்சமயம் மிகப்பெரிய அதிர்வலைகளை ஏற்படுத்தியிருக்கும் செய்தி, 'நியூஸ் தமிழ் 24×7' செய்தித் தொலைக்காட்சியின் இயக்குநரும் தொழிலதிபருமான ஆர். பிரேம்குமாரின் கைது நடவடிக்கைதான்.
பாரத் லஜ்னா மல்டி-ஸ்டேட் ஹவுசிங் கோ-ஆப்பரேடிவ் சொசைட்டி (Bharat Lajhna Multi-State Housing Cooperative Society) என்ற கூட்டுறவு அமைப்பின் மூலம் சுமார் 5,000 கோடி ரூபாய் வரை நிதி முறைகேடு மற்றும் மோசடி செய்ததாக எழுந்த குற்றச்சாட்டின் அடிப்படையில் காவல் துறையினரால் இவர் கைது செய்யப்பட்டுள்ளார்.
இந்த வழக்கின் முதன்மைப் புள்ளியாக இருக்கும் பிரேம்குமார், தொடக்கத்தில் பாரத் லஜ்னா கூட்டுறவுச் சங்கத்தைத் தொடங்கி, அதில் பொதுமக்கள் மற்றும் முதலீட்டாளர்களிடமிருந்து ஆயிரக்கணக்கான கோடி ரூபாயை டெபாசிட்டாகப் பெற்றுள்ளார். வீட்டுமனை மற்றும் அதிக வட்டி ஆசை காட்டி திரட்டப்பட்ட இந்த மக்கள் பணம், கூட்டுறவுச் சங்கத்தின் உண்மையான நோக்கங்களுக்குப் பயன்படுத்தப்படாமல், சட்டவிரோதமாக திசை திருப்பப்பட்டதாக புலனாய்வு அமைப்புகள் குற்றம் சாட்டுகின்றன.
இவ்வாறு சேகரிக்கப்பட்ட பெருந்தொகை, தனிப்பட்ட வங்கிக் கணக்குகளுக்கும், சொகுசு ரிசார்ட்டுகள், உணவகங்கள், திரையரங்குகள் போன்ற பிற வணிகத் திட்டங்களுக்கும் தாராளமாகத் திருப்பி விடப்பட்டிருப்பது விசாரணையில் தெரியவந்துள்ளது.
இந்த நிதிப் பலத்தைப் பயன்படுத்தியே, தமிழகத்தில் 'நியூஸ் தமிழ் 24×7' என்ற தொலைக்காட்சி தொடங்கப்பட்டு இயங்கி வந்ததாகவும், ஊடகப் பிம்பத்தைக் கொண்டு தனது பிற தொழில்களைப் பாதுகாக்கவும் விரிவாக்கவும் முயற்சி நடந்தது.
தற்போது பொருளாதாரக் குற்றப்பிரிவு மற்றும் மத்திய-மாநில விசாரணை அமைப்புகள் இந்த முறைகேட்டின் ஒவ்வொரு கண்ணியையும் தீவிரமாகக் கண்காணித்து வருகின்றன.
பாதிக்கப்பட்ட முதலீட்டாளர்களின் பணத்தை மீட்பதற்கான சட்ட நடவடிக்கைகளும், திசை திருப்பப்பட்ட சொத்துக்களை முடக்கும் பணிகளும் வேகமெடுத்துள்ளன.
Jothi G (ஜோதிஜி)
No comments:
Post a Comment