பல கோடி சொத்துள்ளவர், நான்கு தொழில் நிறுவனங்களை நடத்துபவர், திருப்பூரின் மிகப் பெரிய ஸ்மின்னிங் மில் முதலாளி மகளை திருமணம் செய்திருப்பவர் வேறெந்தக் கட்சியில் சேர்வார். ..?
https://www.facebook.com/photo/?fbid=40054246540832752&set=a.587994654551431
திமுகவில் சேர்வதால் இன்னும் சமூக பொருளாதார அந்தஸ்த்தை உயர்த்திக் கொள்ள வேண்டும் என்ற நிலையில் போவது அவர் விருப்பம். அதற்கு ஐந்து காரணங்களை பட்டியலிட்டு விளக்கம் எதற்கு?
சொல்லப்பட்டவை அனைத்தும் அபத்தம்! இதில் பாஜக எதிர்ப்பு எதையும் பேசாமல் தவிர்த்துக் கொண்டதில் இருக்கிறது, பாரதி சுப்பராயனின் சாமார்த்தியம்!
கம்யுனிஸ்ட் சித்தாந்தத்தை காட்டிலும் என்ன பெரிய உயர்ந்த சித்தாந்தத்தை திமுகவில் கண்டுவிட்டார்..?
இன்றைக்கு இரு கம்யூனிஸ்ட் கட்சிகளுக்கு உள்ளேயும் கூட மார்க்சிய சித்தாந்தத்தைவிட திராவிட சித்தாந்தத்தை தலைமுழுக்க வைத்துக் கொண்டு சிலாகித்துக் கொண்டிருப்பவர்கள் கணிசமாக உருவாகி இருப்பது, இடதுசாரி கட்சிகளுக்கே ஒரு சவாலாகியுள்ளதையும் பார்க்க முடிகிறது.
இவரது அப்பா சுப்பராயன் எட்டு முறை தேர்தலில் நிற்கும் வாய்ப்பை பெற்றவர். இந்திய கம்யுனிஸ்ட் கட்சியிலும், ஏ.ஐ.டி.யூ.சி தொழிற்சங்கத்திலும் மிகப் பெரிய பொறுப்புகளை வகித்தவர். 10 ஆண்டுகள் எம்.எல்.ஏவாகவும், 12 ஆண்டுகள் எம்.பியாகவும் வாய்ப்பு பெற்றவர்.
ஒரு சாதாரண எளிய தொழிலாளியின் மகனாக 10 ஆம் வகுப்பு மட்டுமே படித்திருந்த சுப்பராயனுக்கு மிகப் பெரிய வாய்ப்புகளையும், சமூக அந்தஸ்த்தையும் உருவாக்கித் தந்தது இந்திய கம்யூனிஸ்ட் கட்சி. இன்றைக்குள்ள திருப்பூர் சுப்பராயனின் சமுக அந்தஸ்த்தும் ,பொருளாதார வளமும் ஒரு கம்யூனிஸ்டின் இலக்கணத்திற்கு பொருந்தி வராதவை!
இந்தியக் கம்யூனிஸ்ட் கட்சியைக் காட்டிலும் மேலான நல்ல கட்சி இந்த பூவுலகிலேயே இருக்க முடியாது என்று இன்றும் நம்பிக் கொண்டிருக்கும் சிலரும் அந்தக் கட்சியில் இப்போதும் இருக்கத் தான் செய்கிறார்கள்.
பொதுவுடமைக் கொள்கை பிடிப்பு, பொது வாழ்க்கையில் நேர்மை, சதா சர்வகாலமும் எதிர்பார்ப்புகளின்றி வேலைகளை இழுத்துப் போட்டு செய்வது, போராட்டங்கள் என்றால், போஸ்டர் ஓட்டுவது, நரம்பு புடைக்க கோஷம் போடுவது..என்ற வாழ்க்கை முறை கொண்டவர்களும் இன்றும் இருக்கவே செய்கிறார்கள். இவர்கள் வாழ்க்கை இப்படியே இருந்து, ஏதோ ஒரு மனநிறைவில் முடிந்து விடும்.
ஆனால், திருப்பூர் சுப்பராயன் மகன் பாரதி சுப்பராயன் தன் தந்தையின் பிரச்சாரக் கூட்டத்தை வேடிக்கை பார்க்கும் ஒருவனாகக் கூட அதுவரை இருந்திராதவர் 2024 நாடாளுமன்றத் தேர்தலில் நவீன மனிதர்கள் என்ற தன் அமைப்பு வாயிலாக அப்பாவிற்கு பிரச்சாரம் செய்தார்.
கட்சி சட்டவிதிகளுக்கு மாறாக 75 வயதுக்கு மேல் பதவிகள் வகிக்கக் கூடாது என்பதை மீறி திருப்பபூர் சுப்பராயன் பிடிவாதமாக 76 வயதில் வாய்ப்பு பெற்றுத் தான் 2024 நாடாளுமன்றத் தேர்தலில் வென்றார். தான் இருந்த வரை கொங்கு மண்டலத்தில் தன்னை மீறி இளம் தலைவர்கள் யாரும் உருவாகாத மாறி பார்த்துக் கொண்டு கட்சியை ஷீண நிலைக்கு கொண்டு போய்விட்டார். கட்சியில் ஈடுபாடே இல்லாத மகனுக்கு எம்.பியாகும் வாய்ப்பு இந்திய கம்யூனிஸ்ட் கட்சிக்குள் எப்படி கிடைக்கும்…? வாரிசு அரசியலுக்கு கம்யூனிஸ்ட் கட்சியில் இடமில்லை.
கொங்கு மண்டலத்தில் தில்லாலங்கடி அரசியலுக்கு பேர் போன செந்தில் பாலாஜிக்கு கீழ் ஒரு சீடனாகத் தான் திமுகவில் தன் பயணம் இருக்கும் என்று தெரியாமலா அங்கு போயிருப்பார் இந்த நபர்? -சாவித்திரி கண்ணன்
1974 முதல் திருப்பூர் நாடாளுமன்ற உறுப்பினர் கே. சுப்பராயனோடு நான் நட்பில் உள்ளவன். -வே முத்துராமலிங்கம்
நான் காங்கிரஸ் கட்சியில் இருக்கிறேன். கட்சி எல்லைகளைக் கடந்த தோழமை! அவரைப் பற்றிய உங்கள் தகவல்கள் சரியல்ல. அவர் உடமையற்ற ஒரு கம்யூனிஸ்டாகவே இருக்கிறார். அவரது துணைவியார் சுகாதாரத் துறையில் செவிலியராக இருந்து ஓய்வு பெற்றவர். அவரது குடும்ப பராமரிப்பு,கண்காணிப்பில் ஒரே மகனான பாரதியை படிக்க வைத்தார். பிறகு ஒரு ஏற்றுமதி பனியன் நிறுவனத்தை பங்குதாரர்ரோடு துவக்கி நல்ல முறையில் பாரதியும் அவரது பங்குதாரரும் நடத்தி வருகிறார்கள் !
இந்த நிலையில் மகன் பாரதி திருமணம் செய்தார். நீங்கள் குறிப்பிட்ட அந்த பெரிய மில் அதிபரின் சகோதர குடும்ப உறுப்பினர் ஒருவரின் மகளை திருமணம் செய்தார். அந்த பெரிய நிறுவனத்திற்கும் பாரதி மாமனாருக்கும் எந்தவித தொழில் உறவும் இல்லை. பாரதி திருமணம் செய்த நடுத்தர குடும்பத்தில் மூன்று பெண்கள் மட்டுமே என்பதால், மாமனார் மறைவுக்கு பிறகு பாரதியின் மனைவிக்கு வந்த பாக சொத்துக்களை பாரதியும் அவரது துணைவியாரும் நிர்வாகம் செய்து வருகிறார்கள்!
பாரதி சுப்பராயன் தான் படிக்கும் காலத்திலேயே பெரியார் கொள்கைகளில் ஈடுபாடு கொண்டவர். அவர் எப்போதும் இந்திய கம்யூனிஸ்டு கட்சியிலோ, அதன் துணை அமைப்புக்களிலோ சேரவே இல்லை. அதில் அவருக்கு விருப்பமும் இல்லை. பெரியாரியல் சித்தாந்தம் தான் அவரது அரசியல்! திராவிட இயக்கம், கம்யூனிஸ்டு கட்சிகள், காங்கிரஸ் ஆகியன கடந்த காலங்களில் கூட்டணியில் இருந்ததால், தேர்தல் காலங்களில் இந்த கூட்டணிக்கு அவர் நண்பர்களோடு சேர்ந்து ஒரு அமைப்பின் கீழ் ஆதரவு தந்தார்கள்!
எனவே நவீன மனிதர்கள் அமைப்பு சுயாதீனமாக எடுத்த முடிவே திமுகவில் சேர்வது என்பதாகும். இரண்டு மாதங்களுக்கு முன்பு பாரதி சுப்பராயன் இது பற்றி என்னிடம் நட்பு ரீதியாக கருத்து கேட்ட போது, நான் எனது அனுபவத்தில் சில கருத்துக்களை கூறி, எல்லா கோணங்களிலும் நன்கு யோசித்து முடிவை எடுங்கள் என்று கூறினேன். பாரதி திமுகவில் சேருவதற்கு முன் வெளியிட்ட கானொலியில் கூறிய ஐந்து காரணங்களில் எனக்கும் உடன்பாடு இல்லை!
பாரதி ஒரு வாரம் முன்பு தான் தனது தந்தையிடம் இந்த முடிவை ஒரு தகவலாக மட்டுமே கைபேசியில் கூறினார்! தோழர் சுப்பராயனும் இதை ஒரு தகவலாக மட்டுமே எடுத்துக் கொண்டார்! தவிர மகன் படிக்கும் காலம் முதல் மகனின் கல்வி , தொழில், அரசியல் என எந்த செயல் பாட்டிலும் அவர் தலையிடுவதில்லை. எனவே இதில் சுப்பராயனையோ, கம்யூனிஸ்ட் கட்சியையோ சம்பந்தப்படுத்த வேண்டாம்! சுப்பராயன் இரண்டு முறை எம் எல் ஏ, மூன்று முறை எம்.பி. பதவிகளில் இருந்துள்ளார்! இதில் ஒரு கம்யூனிஸ்ட் வாழ்க்கை முறையை எந்த நிலையிலும் கராராக கடைபிடித்து வாழ்ந்து வருகிறார்! கட்சி அரசியலில், பதவிகளில் இருப்பவர்கள் மீது பொதுவெளியில் உருவாகி இருக்கும் சராசரி பார்வையில், பிரித்துப் பார்க்காமல் தவறாக விமர்சிப்பது நியாயமில்லை! எனவே சாவித்திரி கண்ணன் இது போன்ற சமயங்களில் உண்மை நிலையை அறிந்து பதிவு செய்வதே, அறம் சார்ந்த ஊடக தர்மம் என்பதை சுட்டிக் காட்ட விரும்புகிறேன்!
No comments:
Post a Comment