உடல் ஆரோக்கியத்திற்கு உகந்தது - மாற்றும் ஐநா & நாடுகள்

 ஒரு காலத்தில் வனஸ்பதி உபயோகியுங்கள்.  Vino Mohan

உடல் ஆரோக்கியத்திற்கு அது உகந்தது என்றது இந்திய அரசின் உணவு துறை .
அப்புறம் காபி குடியுங்கள், அறிவு கூர்மையாகும் என்றது காபி போர்ட் என்ற அரசு வாரியம்..
தேநீர் குடியுங்கள்! சுறுசுறுப்பாக இருப்பீர்கள் என்றது தேயிலை வாரியம்.
மைதா தான் இனிமேல்..
பரோட்டா செய்ய்யலாம். ரொட்டி சுடலாம்.. பிஸ்கோத்துகள் செய்யலாம்.
மைதாவை உணவில் அதிகம் சேர்த்துக்கொண்டால் உணவு பஞ்சம் தீரும் என்றது அதே இந்திய அரசு..
முட்டை சாப்பிடுங்கள். குழந்தைகளுக்கு தினம் ஒரு முட்டை அவ்வளவு நல்லது என்று தேசிய கோழிமுட்டைகள் ஆணையம் அறிவுறுத்தியது..
இதே ரீதியில் 1975 ஆம் ஆண்டு வாக்கில் ஒரு அறிவிப்பை தமிழ் நாடு வேளாண்மை தொழில்கள் இணையகம் வெளியிட்டது.
ரத்தத்தில் கொலஸ்ட்ரால் என்று ஒரு கெட்ட வஸ்து இருக்கிறது..
இதயத்தில் அடைப்பை உண்டாக்கும்.இதய நோய் வரும்.
அதை தவிர்க்க கடலை எண்ணையை நீங்கள் அறவே தவிருங்கள்... சனோலா சூரிய காந்தி எண்ணெய்யை உபயோகியுங்கள் என்றது அந்த Agro Industrial Corporation விளம்பரம்.

எப்படி இருக்கிறது இந்த கதைகள் எல்லாம்?
சனோலா என்ற இந்த சூரியகாந்தி எண்ணெய்யை இங்கே அக்ரோ இண்டஸ்ட்ரியல் கார்பொரேஷன் அறிமுகம் செய்வதற்கு முன்பே வட நாட்டில் இருந்து
Sufola என்று இன்னொரு லா இங்கு விற்பனை ஆகிக்கொண்டு இருந்தது.சனோலாவுக்கு அக்கா இந்த Sufola.
விவித பாரதியில் சனோலா சமையல் எண்ணெய்க்கு எவ்வளவு விளம்பரங்கள்?
அப்போது எல்லாம் கடைகளில் சமையல் எண்ணெய்கள் எல்லாம் கிலோ கணக்கில் தான் எடைப்போட்டு ஊற்றுவார்கள்.
லிட்டர் கணக்கில் சொல்வதென்றால் சுமாராக 900 கிராம் கொண்டது ஒரு லிட்டர்.
ஒரு கிலோ கடலை எண்ணெய் ரூ.5:50 குள் இருந்தது.அதாவது 1977 இல் இது தான் மார்க்கெட் நிலவரம்.
திடம் நல்லெண்ணெய் 6.00 ரூபாய் அக்மார்க் நல்ல எண்ணெய் என்றால் 06-40 காசு..
கடலை எண்ணெய்க்கும் மூத்தவள் ஒருத்தி இருந்தாள்.
சுத்திக்கரிக்கப்பட்ட கடலை எண்ணெய்.
Refined ground nut Oil.
அதற்கு ரேடியோ ஆயில், OK ஆயில் என்றெல்லாம் கூட பேர் உண்டு.
ரேடியோ, ஓகே இரண்டும் brand names.
மக்களிடையே பொது பெயராக மாறிப் போனது.
வனஸ்பதிக்கு கூட டால்டா என்ற brand name ஆகி வந்துவிட்டது.

இந்த சனோலா வந்தாலும் வந்தது. எல்லோருக்கும் கொலஸ்ட்ரால் என்ற கொழுப்பு பயம் வந்து விட்டது.
என்னவோ கடலை எண்ணெயில் தான் கொழுப்பு இருக்கிறது என்பது போல ஒரு மாயை.
கொழுப்பாவது... குந்தாணியாவது என்று சென்னைக்கு அப்பால் இருந்த எல்லா மக்களும் கடலை எண்ணெயையே உணவில் சேர்த்துக்கொண்டு இருக்க,
வந்ததம்மா ஒரு ஆயில்.
பனை மரத்து ஆயில்.
மலேசியாவில் இருந்து இறக்குமதியாகி வந்தது அந்த வில்லன் பனங்கொட்டை எண்ணெய்.
கடலை எண்ணெயை விடவும் விலை குறைவு.
கொழுப்பும் இல்லை.
சட்டியில் காயும் போது பொங்கவும் செய்யாது.
விளம்பரமே இல்லாமல் இவ்வாறு Palm Oil மகாத்மியம் தமிழ் நாடு முழுக்க பரவ,
அப்போதைய முதல்வர் MGR ரேஷன் கார்டுக்கு palm oil ஊற்ற செய்தார்.
அப்போது வீழ்ந்தது கடலை எண்ணெய்..

இந்த சனோலா 1977 இல் எண்ணெய் விலை என்ன தெரியுமோ?
ஒரு லிட்டர் பாட்டில் ரு11-25 காசு.ஆமாம். பாட்டில் இனாம். பிற்பாடு வந்து pet jar களுக்கு அம்மா இந்த சனோலா பாட்டில்கள் தான்.
கடலை எண்ணெய்க்கும் சனோலாவுக்கும் விலை வித்தியாசம் நாலுரூபாய் ஐம்பது பைசா.
ஆனால் சனோலா வாங்கினால் ஒரு வெள்ளை பிளாஸ்டிக் பாட்டில் கூடவே கிடைக்கிறது.
சனோலா நூறு கிராம், ஐம்பது கிராம் என்று சில்லறை விற்பனையில் கிடைக்காது.
ஆஆ... இன்னொரு விஷயம் மறந்தே போனேனே. சனோலா லிட்டரில் தான் கிடைக்கும், அதாவது 100 கிராம் குறைவாக தான் கிடைக்கும்.
எனவே சனோலா என்பது கொஞ்சம் கூட காசும், இன்னும் கொஞ்சம் கூட கொழுப்பு என்கிற கொலஸ்ட்ரால் இருப்பவர்களும் மட்டுமே வாங்கி உபயோகிக்கும் வஸ்துவாக ஆனது.
இந்த சனோலா உட்பட சகல உணவு எண்ணெய்களையும் (Edible oil )நானே ஆலந்தூரில் அபிராமி ட்ரேடேர்ஸ் என்கிற எங்கள் மாமா கடையில் விற்றிருக்கிறேன்.

இப்போது நிறைய சூரிய காந்தி பூ எண்ணெய் வருகின்றன.
அம்புட்டு எண்ணெயும் அவ்வளவு கெடுதல் என்கிறான்கள் இப்போது.
கொலஸ்ட்ராலில் நல்ல கொலஸ்ட்ரால் என்றும் இருக்கிறது. அது உடலுக்கு மிக அவசியம் என்று வேறு சொல்லுகிறார்கள்.
1977 ஆம் ஆண்டில் வேண்டாம் வேண்டாம் என்று கரடியாக கத்தி சொன்ன கடலை எண்ணெய் மிக நல்லது.
அதில் இருக்கும் கொழுப்பு நல்ல கொழுப்பு என்று conduct certificate கொடுக்கிறார்கள்.
எங்கள் வீட்டில் இப்போது செக்கு கடலை எண்ணெய் தான்.
விலையா? உடம்பு ஆரோக்கியம் முக்கியம் ஸ்வாமி.
விலை கிடக்கிறது விலை.
உடல் நிலையை பாருங்க மாமி என்கிறார்கள் பொது மக்கள்.

இளமை ஊஞ்சல் ஆடுகிறது படத்தில் ரஜினிகாந்த் ஒரு இண்டஸ்ட்ரியலிஸ்ட். கனகாம்பர விதையில் இருந்து சமையல் எண்ணெய் தயாரிக்க ஒரு ஒப்பந்தம் போடுவதாக காட்சி ஒன்று வரும்.
எனக்கு நன்றாக நினைவிருக்கு. கனகாம்பர எண்ணெய் விற்க அவ்வளவு ஆவலாக இருந்தேன். ம்ம்ஹும்.
ஆனால் பருத்தி கொட்டை எண்ணெய் விற்றிருக்கிறேன்.
சிவாஜி மார்க் Cotton Seed Oil.