2026 Opinion Polls: தமிழ்நாட்டில் ஆட்சி அமைக்கப்போவது யார்? வெளியான CNN - News18

 2026 Opinion Polls: தமிழ்நாட்டில் ஆட்சி அமைக்கப்போவது யார்? வெளியான CNN - News18 கருத்துக்கணிப்பு Published by:Arivazhagan T news18-tamil    March 23, 2026 

CNN News18 Tamil Nadu Election 2026 Opinion Polls கருத்துக் கணிப்பில் தமிழ்நாட்டின் அடுத்த முதலமைச்சராக மக்கள் யாரை பார்க்கிறார்கள், எந்தக் கட்சிக்கு எவ்வளவு தொகுதிகள் வரை கிடைக்கும் உள்ளிட்டவை குறித்து மக்கள் கருத்து தெரிவித்துள்ளனர்.

தமிழ்நாட்டில் உள்ள 234 சட்டமன்றத் தொகுதிகளுக்கும் வரும் ஏப்ரல் 23ஆம் தேதி ஒரே கட்டமாக தேர்தல் நடைபெற இருக்கிறது. தொடர்ந்து இரண்டாவது முறையாக ஆட்சியை பிடிக்க திமுகவும், இழந்த ஆட்சியை மீண்டும் பிடிக்க அதிமுகவும் தயாராகி வருகின்றன.

இந்தச் சூழலில் சி.என்.என். நியூஸ்18 நடத்திய தேர்தலுக்கு முந்தைய முதற்கட்ட கருத்துக் கணிப்பு வெளியாகியுள்ளது. இதில் எந்தக் கட்சி ஆட்சியை பிடிக்கும், எந்தக் கட்சிக்கு எவ்வளவு தொகுதிகள் என்பது மட்டுமின்றி, மாநிலத்தில் உள்ள பிரச்சனைகள் என்ன? தற்போதைய ஆட்சி எப்படி இருக்கிறது என பல கோணங்களிலும் கருத்துக் கணிப்பு நடத்தப்பட்டுள்ளது.

கருத்துக் கணிப்பில், கடந்த ஐந்து ஆண்டுகளில் தற்போதைய மாநில அரசின் ஒட்டுமொத்த செயல்பாட்டை எவ்வாறு மதிப்பிடுவீர்கள் என எழுப்பப்பட்ட கேள்விக்கு மிகவும் நன்றாக இருந்ததாக 32.7% பேரும், நன்றாக இருந்தது என 7.4% பேரும், சராசரி என 12.3% பேரும், மோசம் என 18.9% பேரும், மிகவும் மோசம் என 20.1% பேரும், கருத்தில்லை என 8.6% பேரும் தெரிவித்துள்ளனர்.

2026ல் யாரை முதலமைச்சராக்க விரும்புகிறீர்கள் எனும் கேள்விக்கு 39.9% பேர் தற்போதைய முதலமைச்சர் மு.க. ஸ்டாலினையும், 37.5% பேர் முன்னாள் முதலமைச்சர் எடப்பாடி பழனிசாமியையும், 14.7% பேர் தவெக தலைவர் விஜய்யையும் தேர்வு செய்துள்ளனர்.

மிக முக்கியமான பிரச்சினையாக எது இருக்கிறது எனும் கேள்விக்கு 15.5% பேர் வேலைவாய்ப்பின்மை என்றும், சட்டம் ஒழுங்கு பிரச்சினை என 17.3% பேரும், 17.8% பேர் பெண்கள் பாதுகாப்பு, 20.1% பேர் மது மற்றும் போதை, 5.2% பேர் வளர்ச்சி இல்லாதது பிரச்சினை என்றும் தெரிவித்துள்ளனர்.

தற்போதைய சட்டமன்ற உறுப்பினர் மீண்டும் போட்டியிட்டால், அவருக்கு வாக்களிப்பதற்கான வாய்ப்பு எவ்வளவு?" எனும் கேள்விக்கு 31.6% பேர் அதிக சாத்தியம் என்றும், 23% பேர் சாத்தியமில்லை என்றும் தெரிவித்துள்ளனர். மேலும் 5.6% பேர் வாய்ப்பிருக்கிறது என்றும் தெரிவித்துள்ளனர். குறிப்பாக சாத்தியமில்லை என 28.7% பேர் தெரிவித்துள்ளனர். மேலும், கருத்தில்லை என 11.1% பேர் தெரிவித்துள்ளனர்.

தமிழ்நாட்டில் போட்டி எவ்வாறு அமையும்?" எனும் கேள்விக்கு 41.2% பேர் முழுமையாக இருமுனை என்றும், 12.6% பேர் ஓரளவு இருமுனை என்றும், 18.7% பேர் மூன்று முனை போட்டியாக இருக்கும் என்றும், 12% பேர் முழு மூன்று முனை போட்டியே என்றும், 15.6% பேர் கருத்தில்லை என்றும் தெரிவித்துள்ளனர்.

தமிழ்நாட்டில் யாருடைய பதவிக்காலம் சிறந்தது? எனும் கேள்விக்கு 2021 முதல் தற்போது வரையிலான மு.க. ஸ்டாலினின் பதவிக் காலம் சிறந்தது என 40.6% பேரும், 2016 முதல் 2021 வரையிலான ஜெயலலிதா மற்றும் எடப்பாடி பழனிசாமியின் பதவிக் காலம் சிறந்தது என 44.6% பேரும், இருவரும் சமம் என 4% பேரும் தெரிவித்துள்ளனர். மேலும், யாருமில்லை என 7.9% பேரும், கருத்தில்லை என 2.8% பேரும் தெரிவித்துள்ளனர்.

2026ல் எந்தக் கட்சிக்கு எவ்வளவு வாக்கு சதவீதம் கிடைக்கும்?" எனும் கேள்விக்கு 40.1% திமுக தலைமையிலான கூட்டணி என்றும், 38.1% அதிமுக தலைமையிலான கூட்டணி என்றும், 14.8% பேர் தவெகவுக்கும், 2.7% பேர் நாதகவுக்கும் வாக்குகள் கிடைக்கும் எனவும், பிற என 1.6% பேரும், இன்னும் முடிவு செய்யவில்லை அல்லது கருத்தில்லை என 3.1% பேரும் தெரிவித்துள்ளனர்.

தொகுதிகளைப் பொறுத்தவரை 113 முதல் 123 தொகுதிகள் வரை திமுக கூட்டணியும், 106 முதல் 116 தொகுதிகள் வரை அதிமுக கூட்டணியும், 2 முதல் 8 தொகுதிகள் வரை தவெகவும் பெறுவதற்கு வாய்ப்புள்ளது என்றும் தெரிவித்துள்ளனர்.

https://tamil.news18.com/tamil-nadu/tamil-nadu-election-2026-cnn-news18-opinion-poll-who-is-next-cm-nw-azt-ws-bl-2067287.html?utm_source=copy_share&utm_medium=clipboard&utm_campaign=clipnshare