ஏமனில் சமஸ்கிருத கல்வெட்டுகள்!

 ஏமனில் சமஸ்கிருத கல்வெட்டுகள்!

எகிப்தில் தமிழ், பிராகிருத, சமஸ்கிருத கல்வெட்டுகள் கிடைத்த செய்தி பரவலாகப் பேசப்பட்டு வருகிறது. இது தொடர்பான ஆய்வறிக்கையை வெளியிட்டவர்களுள் ஒருவர் இங்கோ ஸ்ட்ராச். இவர் 2012ஆம் ஆண்டு Foreign Sailors on Socotra: The Inscriptions and Drawings from the Cave Hoq என்ற நூலை எழுதியிருக்கிறார்.

இந்த நூலில் மிக முக்கியமான ஒரு கண்டுபிடிப்பு பற்றி எழுதியுள்ளார். அதாவது

ஏமன் நாட்டைச் சேர்ந்த தீவு சகோட்ரா. இங்குள்ள ஒரு குகையில் 200 சமஸ்கிருத கல்வெட்டுகள் கிடைத்துள்ளன. இதை விரிவாக ஆய்வு செய்து எழுதியுள்ளார்.

இவை அத்தனையும் பெரும்பாலும் பெயர்கள். சில பெயர்களுடன் பெயர் பொறித்தவரது தொழில் ஊர் ஆகியவை குறிப்பிடப்பட்டுள்ளன. இந்தப் பெயர்களில் விஷ்ணு, சர்மன் எல்லாம் இருக்கின்றன.

இந்த பெயர்களை எழுதியவர்கள் பெரும்பாலும் இந்தியாவின் மேற்குப் பகுதியில் இருந்து வந்தவர்கள் என்று குறிப்பிடப்பட்டுள்ளது. கல்வெட்டுகளில் தெளிவாகவே 'ப்ருகு கச்சம்' (இன்றைய குஜராத் பரூச்) என்ற ஊர் பெயர் குறிப்பிடப்பட்டுள்ளது.

இவற்றின் காலம் பொ.யு.(கி.பி.) முதல் நூற்றாண்டு முதல் ஐந்தாம் நூற்றாண்டு வரை. இந்த காலகட்டத்தில் இந்திய வணிகர்கள் பலர் இங்கு வந்துள்ளது தெரிகிறது. அவர்கள் எழுதிய பெயர்கள் மூலம் வந்தவர்களில் வைணவர், சைவர், பௌத்தர் என அனைத்து சமயத்தவரும் இருந்தது தெரிய வருகிறது.

குஜராத்தைச் சேர்ந்த கடல் வணிகர்கள் மிகப் பழங்காலத்தில் இருந்தே தொலைதூர கடற் பயணம் மேற்கொண்டனர் என்பது இதன் மூலம் நிரூபிக்கப்பட்டுள்ளது.