விபரமாக அடுத்த, குமரிக்கண்டம் குறித்த கடைசி பதிவில் எழுதுகிறேன்.
கடைசிப்பதிவிற்கு பின்னூட்டமாக, இந்த தொடரை முதலில் இருந்து படித்தவர்கள், தமது சந்தேகங்களை எழுதலாம், புவியியல் அடிப்படையில் எனக்குத்தெரிந்தவரை பதிலளிக்க முயற்சிக்கிறேன்.
லெமூரியா - குமரிக்கண்டம் - 13
தொல்லியல் ஆய்வுகள் பண்டைய நாகரீகத்தைப்பற்றிய தகவல்களை அறிந்துகொள்ள உதவுவதோடு, மனிதகுல தோற்றம், நகர்வு, பரவல், நாகரிக பரிணாமவளர்ச்சி, ஆகியவற்றை சரியானபடி புரிந்துகொள்ளவும், சரித்திரகால நிகழ்வுகளாக செவிவழி செய்திகளை ஆதாரத்துடன் நிரூபிக்க உதவுகின்றன. உலகெங்கும் இதுவரை தொல்லியல் ஆய்வுகள் மண்ணுக்கடியில் புதைந்துகிடக்கும் பொருட்கள், கட்டிடங்கள், மனிதன் உபயோகப்படுத்திய கருவிகள் ஆகியவற்றை அகழாய்வு மூலம்
வெளிக்கொணர்ந்து அவற்றை பலவித பரிசோதனைகளுக்கு உட்படுத்தி கிடைக்கும் தரவுகளின் அடிப்படையிலேயே இதுவரை இருந்திருக்கிறது. ஆனால் எங்கு தோண்டுவது? இந்த கேள்விக்கு இதுவரை சரியான விடை கிடைத்ததில்லை. இதுவரை தோண்டப்பட்ட இடங்களில் எல்லாம் தேவையான ஆதாரங்கள் கிடைத்ததில்லை; தோண்டப்பட்ட இடங்களும், இங்கு கட்டாயமாக ஆதாரங்கள் கிடைக்கும் என்று "நம்பப்படும்" இடங்களாகவே இருந்துள்ளன. அதேபோல் தரைமட்டத்தில் பொதுமக்களால் ஏதேனும் ஆதாரங்கள் கண்டுபிடிக்கப்பட்டோ, அல்லது வேறேதேனும் அதிர்ஷ்டவசமாகவோ தான் அகழாய்வுக்குழிகள் தோண்டப்பட்டு வந்திருக்கின்றன. இதனால் தொல்லியல் அகழாய்வு என்பது இதுவரை தொல்லியல் அறிஞர்களின் ஆதாரங்களின் அடிப்படையில்லாமல், அதிர்ஷ்டம், நம்பிக்கையின் அடிப்படையிலேயே இருந்து வந்திருக்கின்றது.
இதுவரை தொல்லியல் ஆய்வு என்பது, விளையாட போன சிறுவர்கள் கண்டுபிடித்தது, வீடு கட்ட அஸ்திவார பள்ளம் தோண்டும்போது கண்டுபிடித்தது, விவசாயத்திற்கு உழவு ஓட்டும்போது கண்டுபிடித்தது என்று (துர்)அதிர்ஷ்டவசமாக கண்டுபிடித்தவை தானேயொழிய முறையான தொல்லியல் ஆய்வின் மூலம் கண்டுபிடிக்கப்பட்டுள்ளவை அல்ல. அப்படியே ஏதேனும் அகழாய்வில் அகப்பட்டால், மூட்டை கட்டி செல்லரிக்க விடுவார்களேயன்றி, கிடைத்த பொருட்களை முறையான ஆய்வு செய்து பன்னாட்டு அறிவியல் சஞ்சரிகைகளில் பதிப்பிக்க மாட்டார்கள். இதைச் செய்யாம அப்பறம் எப்படி தமிழன் பெருமையை உலகறியச் செய்வது?
அதேபோல், தொல்லியல் ஆய்வு என்பது சமீபகாலத்திலிருந்து, சற்றேறக்குறைய சில ஆயிரம் ஆண்டுகளுக்கு முன் உருவான நில/மண் பகுதிகளிலேயே நடத்தப்பட்டு வந்திருக்கிறது. தொல்லியல் ஆய்வுப்போலவே, நிலவியல் ஆய்வுகள் என்பன பலகோடி ஆண்டுகளிலிருந்து, சில லட்சம் அல்லது, பல்லாயிரம் ஆண்டுகளுக்குமுன்புவரை தோன்றிய பாறை/மண் பகுதிகளிலேயே நடத்தப்பட்டு வருகிறது. இந்த இரண்டுக்கும் இடைப்பட்ட காகக்கட்டத்தில்தான், மனிதனின் நாகரீக வளர்ச்சி, பரவல், ஆகியன நிகழ்ந்துள்ளன. இந்த காலகட்டத்தை, குறிப்பாக, இந்தகாலகட்டத்தில் நிகழ்ந்த பருவகால மாற்றங்கள், நிலவியல் மாற்றங்கள், மனிதன் உள்ளிட்ட உயிரிகளின் பரிணாம வளர்ச்சி போன்றவற்றை குறித்த ஆய்வுகளுக்கு தக்க அறிவியலார்களோ, அறிவியல் பிரிவோ இல்லை, இதுவரை அப்படிப்பட்ட ஆய்வுகளும், பெருமளவில் நிகழ்த்தப்படவில்லை.
ஸ்ரீபெரும்புதூர் அருகே சுமார் மூன்றுலட்சத்து எண்பத்தைந்தாயிரம் ஆண்டுகளுக்கு முற்பட்ட கற்கால மனிதன் வாழ்ந்தது, வேட்டைக்கருவிகள் போன்ற மனித நடமாட்டங்களுக்கான ஆதாரங்கள், கிடைத்தது சமீபத்தில் தெரியவந்து, அறிவியல் உலகின் உயர்ந்த சஞ்சிகையில் பதிப்பானது. அதேபோல், ஆங்கிலேயர் காலத்திலிருந்தே ஆதிச்சநல்லூர், கொற்கை, புகார் போன்ற இடம் அல்லாது, மிகச்சமீபமாக கீழடியிலும் மிகமேம்பட்ட நாகரிக மனித வாழ்விடங்களாக இவை இருந்தமைக்கு சான்றுகள் கிடைத்துள்ளன.
இதேபோல், அலகாபாத் அருகே சமீபத்தில் மேற்கொள்ளப்பட்ட ஆய்வுகள், மனிதநாகரீகம் மேம்பட்டதாக இந்தியாவில் இருந்ததாகவும், சிந்துசமவெளி நாகரிகம் என்பதற்கு பதிலாக, சரஸ்வதி நாகரிகம் என்றே அழைக்கவேண்டும் என்ற கருதுகோளை தூக்கிப்பிடிப்பதாகவே அமைகிறது.
மிகச்சமீபத்தில் DNA அடிப்படையிலான ஆய்வுத்தரவுகள் இந்தியாவிலிருந்தே பண்டைய மனிதர்கள் மேற்குநோக்கி நகர்ந்ததாக ஒரு கருதுகோளை முன்னெடுக்கின்றன. இதுகாறும் ஒப்புக்கொள்ளப்பட்டதாக கருதப்பட்டுவந்த மேற்கிலிருந்து இந்தியாவுக்குள் வேதகாலத்துக்கு முன் மனிதர்கள் வந்ததாக சொல்லப்படும் கருதுகோளை மறுதலிக்கிறது.
சுமார் 385000 ஆண்டுகளுக்கு முன் மனித வாழிடமாக ஸ்ரீபெரும்புதூர் இருந்திருப்பதற்கான மறுக்கவியலா ஆதாரங்கள் கிடைத்திருப்பதை இதனுடன் ஒப்புநோக்கினால், பருவகால மாறுதல்களும் (climate change), வாழிடமாறுதல் (habitat change), பழங்கால பேரிடர் நிகழ்வுகளுமே (ancient catastrophic events -சுனாமி, ஊழிப்பெருவெள்ளம், பூகம்பம், நிலச்சரிவு, போன்றவை) மனிதவாழிடத்தை பூமிக்கடியில் புதையுண்டுபோக செய்திருக்கலாம், அதனோடு, மண்ணரிப்பு, நதிகளின் திசைமாறுதல் போன்றவையும், பண்டைய மனித வாழிட ஆதாரங்களை மறைத்திருக்கலாம் என்றும் கருத தூண்டுகின்றன.
அப்படியானால், மிகத்தொன்மையான வாழிடமாக இந்தியாவில் ஏன் பிறநாடுகளில் கண்டுபிடிக்கப்பட்டுள்ளதுபோல பண்டைய வாழிடங்கள் இன்னும் கண்டுபிடிக்கப்படவில்லை? ஏற்கனவே கண்டுபிடிக்கப்பட்டனவும் முறையாக, பன்னாட்டுத்தரத்தில் ஆவணப்படுத்தப்படவில்லை?
தற்போதுவரை நடத்தப்பெற்ற சிற்சில அகழாய்வுகள் புகார் நகரம் கடலுக்குள் பொதிந்திருப்பதையும், இலக்கியத்தில் குறிப்பிட்டபடி ஊழி வெள்ளம், போன்றவற்றால் பண்டைய புகார் துறைமுகம், கொற்கைத்துறைமுகம், அழிந்ததாகவும் தெரியவந்துள்ள உண்மைகள் புவியியல் ஆதாரங்களுடன் தெரியவந்துள்ளன. அதுமட்டுமல்லாது, லோத்தல் என்ற குஜராத்தில் உள்ள பண்டையநகரம் கடல்கொண்டதால் அங்கிருந்தமக்கள் மேட்டுப்பகுதிக்கு நகர்ந்து நகரத்தை கட்டமைத்துக்கொண்டதும், அந்த புதியநகரத்தைச்சுற்றி கடல்வெள்ளம் கொள்ளாதவாறு உயரமான மதில்சுவர் அமைத்திருந்ததும் தெரியவந்துள்ளது. அப்படியிருந்தும், அந்தப்பகுதி புதையுண்டுபோனது.
காவிரியின் நீர்ப்பிடிப்பு பகுதியில் உள்ள தலைக்காடு என்றபகுதியில் சிலநூறு ஆண்டுகளுக்கு முன்னர் நிகழ்ந்த பூகம்பத்தினால் ஒரு கிராமமே பூமியில் புதையுண்டு அங்கிருந்த கோவில் கோபுரம் போன்றவை மட்டுமே வெளித்தெரிகின்றன அதேபோல், காவிரியில் 8000 முதல் 4500 ஆண்டுகளுக்கு முன்பு நிகழ்ந்த பெருவெள்ளங்களும், அதனால் வெள்ளபடிவுகளுக்குள் மூழ்கிப்போன தொல்நிலப்பரப்புகளும் சமீபத்தில் கண்டுபிடிக்கப்பட்டுள்ளன. காவிரியில் ஸ்ரீரங்கம் தீவில் யாத்ரி நிவாஸ் அருகே பலநூறு ஆண்டுகளுக்குமுன் இருந்த வராகப்பெருமாள் சன்னதி, மணவாளமாமுனிகள் திருவரசு ஆகியனவும் இருவருடங்களுக்குமுன் கண்டுபிடிக்கப்பட்டது. இவை வெள்ளபடிவுகளுக்கு கீழே புதையுண்டிருப்பது தெரிய வந்துள்ளது. (காண்க, Archaeological Prospection என்ற அறிவியற் சஞ்சிகையில் பதிப்பிக்கப்பட்ட எமது ஆய்வுக்கட்டுரை. சுட்டியில் கொடுக்கப்பட்டுள்ளது).
பண்டைய குறிப்புகளிலும் இந்த வராகசன்னதிக்கருகே சதுர்வேதிமங்கலம் என்ற கிராமமே இருந்ததாக சொல்லப்பட்டுள்ளது. அதேகுறிப்புகளில் காணப்படும் மணவாளமுனிகளின் திருவரசு இருப்பது உண்மையென கண்டுபிடிக்கப்பட்டுள்ளதால், அந்த கிராமமே பூமிக்கடியில் இருப்பது உறுதியாகிறது. இதை எப்படி அறுதிப்படுத்துவது? அகழாய்வு மூலம் மட்டுமே; அதன்மூலம் கிடைக்கும் பொருட்களை ஆவணப்படுத்துவது மூலம் மட்டுமே; அவற்றின் வயது, மூலாதாரம் ஆகியவற்றை துல்லியமாக நிர்ணயிப்பதன் மூலம் மட்டுமே.
இதுமட்டுமல்ல, இதுபோன்ற எத்தனையோ இடங்கள், பாடற்குறிப்புகளிலும், கல்வெட்டுகளிலும் காணக்கிடைக்கின்றன. இத்தகைய இடங்கள் தமிழகம் மட்டுமல்லாது இந்தியா முழுதும் உள்ளன. இவற்றை எப்படி கண்டு, ஆய்ந்து, இந்திய, தமிழக நாகரிக தொன்மையை உலகுக்கு பறைசாற்றுவது?
பண்டையகாலத்தில் நிகழ்ந்த பேரிடர்கள் (சில இலக்கியங்களிலும் குறிப்பிடப்பட்டுள்ளன) கதைகள் அல்ல, நிஜம். என்ன, இவற்றை, எங்கே, எப்படி தேடுவது, கண்டுபிடித்தவுடன், முறையாக எப்படி பரிசோதிப்பது, பரிசோதிக்கத்தேவையான கருவிகள், துறை விற்பன்னர்கள் கொண்ட குழு/பரிசோதனைக்கூடம் என்பன தான் பிரச்சனை.
அதாவது, அகழாய்வு மேற்கொண்டாலும், அதன்மூலம் கிடைத்த பண்டையகால பொருட்களின் தன்மையை, வயதை, அப்பொருட்கள் வேறெங்கிருந்தும் கொண்டுவரப்பட்டு (வேற்றுநாட்டு நாணயங்கள் போன்றவை) புழக்கத்தில் இருந்திருந்து, புதையுண்டிருந்தால், அவற்றின் மூலாதார பகுதியை கண்டுபிடிக்க தேவையான நவீன பரிசோதனைக்கருவிகள் கொண்ட, பன்னாட்டுத்தரத்திலான துறை/பரிசோதனைக்கூடம் தமிழகத்திலோ, இந்தியாவிலோ இல்லை. இருக்கும் பரிசோதனைக்கூடங்கள்/கருவிகள் பிறத்துறை சார்ந்தவை, புவிசார்தொல்லியலுக்காகவே பணிசெய்பவை அல்ல.
கீழடியில் கிடைத்த பொருட்களை ஆவணப்படுத்துவதற்காக பிறமாநிலங்களுக்கு கொண்டுசெல்லவேண்டியிருந்ததை நினைவுகொள்ளவும்; அதனால் எதனை சமூக, அரசியல் போராட்டங்கள், கருத்துமோதல்கள் ஏற்பட்டன என்பதையும் சேர்த்தே நினைவுகொள்ளவும்.
அதாவது, தொல்லியல் ஆய்வுகள், "தொல்லியல் அறிஞர்களால்" தனியாக நடத்தப்பட்டால், லாட்டரி மாதிரிதான். அதுவும், குருட்டுப்பூனை, இருட்டு அறைக்குள் விட்டத்தில் பாய்வதுபோல்தான். எங்கயோ, எப்பயோ, வெற்றிகிடைக்கலாம்; எல்லா சமயங்களிலும் அல்ல. அதேபோல், புவியியல் ஆய்வாளர்களுக்கு சிலலட்சம் ஆண்டுகள் பழைய படிவுகள், மண் ஆய்வுகள் என்பது, எப்போதோ செய்வது, அத்தியாவசிய தேவை இருந்தால் மட்டுமே. இந்த இருவகை ஆய்வுகளும், இணைந்து, பழங்கால பருவநிலை மாற்றங்கள் நிகழ்ந்த காலநிலை, கால அளவு, புவிபேரிடர் நிகழ்ந்த இடங்கள், அதனால் புவிஅமைப்பில், படிவுப்பாறைகளில் நிகழ்ந்த மாற்றங்கள், கடலோர, நதிசமவெளி புவிஅமைப்பியல் மாற்றங்கள், இயல்புக்கு மாறான பாறை, புவிஅமைப்பியல் நிகழ்வுகள் நடைபெற்ற, நடைபெற்றிருக்கக்கூடிய கால, இட, தகவமைப்புகள் ஆகியவற்றை துல்லியமாக ஆராய்ந்தால், தேவையான க்ளூக்கள் கிடைக்கலாம்; அதனை அடிப்படையாக கொண்டு மேலதிக தரவுகளை திரட்டி, இலக்கிய, புராண, கர்ணபரம்பரை கதைகளை அறிவியற்பூர்வமாக முன்னேறிய தொழிற்நுட்பங்களை கொண்டு ஆராய்ந்து, முடிவுகளை அறிவிக்கலாம்.
இச்சூழ்நிலையில் இரு அவசர, அத்யாவசியத் தேவைகள் உள்ளன:
1. இந்தியாவும், முக்கியமாக தமிழகமும் பண்டைய கற்காலத்திலிருந்தே மனிதவாழிடமாக இருந்துவந்தவை. இதனை இலக்கிய, கல்வெட்டு, செப்புப்பட்டய ஆதாரங்களோடு சொன்னால்மட்டும் போதாது. நவீன அறிவியற்கருவிகளின் சோதனை தரவுகளுடன், பன்னாட்டு தரத்தில் சோதிக்க, அகழாய்வு மேற்கொள்ள, அகழாய்வின்போது கிடைக்கும் பொருட்களை ஆவணப்படுத்த, தனித்துறை, பரிசோதனைக்கூடம், பரிசோதனைக்கருவிகள், இதனில் தேர்ந்த அறிவியற்குழு தேவை.
2. இந்தக்குழு/துறை/பரிசோதனைக்கூடம், முதலில் தமிழகத்தில் உள்ள தொல் வாழிடங்களை, பரிசோதித்து, ஆவணப்படுத்தி, வயது போன்றவற்றை பன்னாட்டு தரத்தில் அறுதிசெய்து மனிதநாகரீகத்தின் தொட்டில் இந்தியக்கண்டமா, அல்லது இந்திய வந்தேறி கண்டமா, இயற்கைப்பேரழிவுகள் எவ்வாறு பண்டைய நாகரிகங்களை பாதித்தது, மனித இடப்பெயர்ச்சி எங்கிருந்து, எத்திசையில், எவ்வப்போது, எதனால் நிகழ்ந்தது என்பதை அறிவியற்பூர்வமாக ஆதாரத்துடன் பதிவு செய்யவேண்டும்.
இது எதையும் செய்யாமல், தமிழன்டாவ், கல்தோன்றி மண்தோன்றா காலத்தே வாளோடு முன்தோன்றிய மூத்தகுடி என்று தமிழ்நாட்டுக்குள்ளேயே கோஷம் போட்டுகொண்டு மீம்ஸ் அறிவியல் பண்ணிக்கொண்டும் இருக்கலாம்.
என்ன செய்யப்போகிறோம் நாம்?
லெமுரியா-குமரிக்கண்டம் குறித்த எனது தொடர் பதிவு இத்துடன் முற்றிற்று.
இந்த தொடரை முதலில் இருந்து படித்தவர்கள், ஏதேனும் சந்தேகம், மாற்று கருத்து இருப்பின் உணர்வு அடிப்படையிலல்லாது, அறிவியற்பூர்வமான பின்னூட்டங்களை எழுதலாம். புவியியல் அடிப்படையில் எனக்கு தெரிந்தவரை பதிலளிக்க முயல்கிறேன்.
' xlink:href='%23b'/%3e%3cuse fill='black' filter='url(%23c)' xlink:href='%23b'/%3e%3cpath fill='white' d='M12.162 7.338c.176.123.338.245.338.674 0 .43-.229.604-.474.725a.73.73 0 01.089.546c-.077.344-.392.611-.672.69.121.194.159.385.015.62-.185.295-.346.407-1.058.407H7.5c-.988 0-1.5-.546-1.5-1V7.665c0-1.23 1.467-2.275 1.467-3.13L7.361 3.47c-.005-.065.008-.224.058-.27.08-.079.301-.2.635-.2.218 0 .363.041.534.123.581.277.732.978.732 1.542 0 .271-.414 1.083-.47 1.364 0 0 .867-.192 1.879-.199 1.061-.006 1.749.19 1.749.842 0 .261-.219.523-.316.666zM3.6 7h.8a.6.6 0 01.6.6v3.8a.6.6 0 01-.6.6h-.8a.6.6 0 01-.6-.6V7.6a.6.6 0 01.6-.6z'/%3e%3c/g%3e%3c/svg%3e){kind=small}
